(၆၅) ကြိမ်မြောက် မြန်မာနိုင်ငံဆရာဝန်ညီလာခံနှင့်  ဆေးနှင့်ဆေးပစ္စည်းပြခန်းဖွင့်ပွဲအခမ်းအနား


မြန်မာနိုင်ငံဆရာဝန်အသင်း၏ (၆၅) ကြိမ်မြောက် မြန်မာနိုင်ငံဆရာဝန်ညီလာခံနှင့် ဆေးနှင့်ဆေးပစ္စည်းပြခန်းဖွင့်ပွဲ အခမ်းအနားကို ဇန်န၀ါရီလ (၁၉) ရက်မှ (၂၂) ရက်နေ့အထိ နေပြည်တော်ရှိ ဥတ္တရသီရိမြို့နယ် အမှတ် (၃၄၊ ၃၅၊ ၃၆) နှင်းဆီလမ်းနှင့် မင်းဘူးလမ်းထောင့် ရှိ မြန်မာနိုင်ငံဆရာဝန်အသင်း အဆောက်အဦ တွင် ကျင်းပခဲ့ပါသည်။ အဆိုပါ  (၆၅) ကြိမ်မြောက် မြန်မာနိုင်ငံဆရာဝန်ညီလာခံတွင် ဆေးပညာ ဟောပြောပွဲ (၃၇) ခု၊ သုတေသနစာတမ်း (၂၄) စောင်၊ ဆေးလက်တွေ့ အတွေ့အကြုံတင်ပြ ဆွေးနွေးခြင်း အစီအစဉ် (၄) ခုတို့ ပါဝင်မည်ဖြစ်ပြီး ကျန်းမာရေးနှင့် အားကစားဝန်ကြီးဌာနမှ ဆေးပညာရှင်များ၊ ပြည်ပမှ ဆေးပညာရှင်များ၊ တပ်မတော်ဆေးတပ်ဖွဲ့မှ ဆေးပညာရှင်များ၊ အထွေထွေရောဂါကု ဆရာဝန်များ ပါဝင်ဆွေးနွေးခဲ့ကြပါသည်။ ဆေးပညာနှီးနှောဖလှယ်ပွဲ နှင့်အတူ ကျန်းမာရေးနှင့် အားကစားဝန်ကြီးဌာနမှ ကျန်းမာရေးပညာပေး ပြခန်းများနှင့် ဆေးနှင့်ဆေးပစ္စည်းပြခန်းပေါင်း (၉၀) တို့ ပါဝင်ပြသသွားပါသည်။ ထို့အပြင် ၂၀၁၈ ခုနှစ်အတွက် ရောဂါဗေဒဘာသာရပ်နှင့် ခွဲစိတ်ဘာသာရပ်တို့တွင် ထူးချွန်သောသူများကို ပေးအပ်ချီးမြှင့်သည့် ပါမောက္ခ ဒေါက်တာဦးခင်မောင်ဝင်းနှင့် ပါမောက္ခ ဒေါက်တာဦးခင်မောင်လတ် ဆုများကိုလည်း မြန်မာနိုင်ငံဆရာဝန်အသင်း ဥက္ကဋ္ဌ၏ ဂုဏ်ပြုညစာစားပွဲတွင် ဆုချီးမြှင့်ခဲ့ပါသည်။

(၆၅) ကြိမ်မြောက် မြန်မာနိုင်ငံဆရာဝန်ညီလာခံတွင် အကောင်းဆုံးစာတမ်းဆု (၃) ဆုနှင့် အကောင်းဆုံး Poster ဆု (၃) ဆုကိုလည်း ဆုများချီးမြှင့်ခဲ့ပါသည်။ အားကစားကဏ္ဍတွင် ပါဝင်သည့် Golf, Scrabble, Jogging အားကစားပွဲများတွင် အနိုင်ရရှိသူများကိုလည်း Get together Dinner တွင် ဆုများချီးမြှင့်ခဲ့ကြောင်း သတင်းရရှိပါသည်။